Somo limetafsiriwa na Mgune Masatu
(Yeremia 18-19, 20 & 21)
Somo hili limetafsiriwa
kutoka katika Copr. 2011, Bruce N. Cameron, J.D. Marejeo yote ya maandiko
yametoka kwenye tafsiri ya New International Version (NIV), copr. 1973, 1978,
1984 International Bible Society, isipokuwa kama itaelezwa vinginevyo. Nukuu
kutoka kwenye tafsiri ya Biblia ya NIV inatumika kwa ruhusa ya Wachapishaji wa
Biblia wa Zondervan. Majibu yaliyopendekezwa yanapatikana kwenye parandesi
(kwenye mabano). Somo limekaa kimtazamo kwamba mwalimu anatumia ubao au sehemu
nyingine yoyote ambayo inaweza kuonekana na wanafunzi. Kama huwa una kawaida ya
kupokea somo hili kwa njia ya barua pepe na hukulipata kwa juma moja, unaweza
kulipata kwa kubofya kwenye www.lesoni.blogspot.com
kwa lugha ya Kiswahili na http://www.GoBible.org
kwa lugha ya Kiingereza pamoja na lugha nyingine kama vile Kifaransa,
Kijerumani. Omba kwa ajili ya uongozi wa Roho Mtakatifu unapojifunza.
Utangulizi: “Hakuna jambo
jema lisiloadhibiwa” ni msemo wa zamani sana. Katika somo letu juma hili,
inaonekana msemo huu ulitumika katika kipindi cha Yeremia! Je, ni mara ngapi
kiongozi wa dini amepata mateso ikiwa ni matokeo ya kuyatenda mapenzi ya Mungu?
Watu wanaohusika na uovu hawataki kukemewa au kukumbushwa juu ya mapenzi ya
Mungu. Bila shaka ndio maana mara nyingine ukubwa wa tatizo unaongezeka kwa
sababu ya upungufu wa hekima na busara, lakini tatizo kubwa ni ukinzani dhidi
ya nuru kwa wale wanaopenda giza (angalia Yohana 3:19-21). Hebu tuzame kwenye
somo letu la Yeremia ili tujifunze zaidi!
I.
Masikio Yawakayo (Yawashayo)
A.
Soma Yeremia 19:1-3. Ikiwa mtu anakuambia kuwa kile
anachotaka kukuambia “kitayawasha” masikio yako, je, utaendelea kusubiria
kuyasikiliza maneno hayo?
A.
Soma Yeremia 19:7. Je, una mipango kwa ajili ya maisha
yako? Je, jambo gani litatokea kwenye mipango ya wale wanaoishi katika nchi ya
Yuda? (Wataangamizwa.)
1.
Binafsi ninabashiri kwamba hakuna mtu hata mmoja ambaye
angependa aliwe na mnyama pale atakapofariki. Kuna jambo gani kubwa hapa
linalojalisha? (Hakuna mtu hata mmoja ambaye anakujali ambaye yuko hai kwa
ajili ya kukuzika!)
A.
Soma Yeremia 19:8-9. Mambo yatakuwa mabaya kwa kiwango
gani kule Yerusalemu? (Watu watakuwa wala nyama - watawala watoto wao wenyewe.)
A.
Soma Yeremia 19:10-12. Mungu anamfanya Yeremia atumie mfano
wa kifaa kinachoonekana, gudulia la mfinyanzi, kufikisha ujumbe wa Mungu kwa
watu. Kwa nini? (Watu tofauti tofauti hujifunza kwa njia tofauti tofauti,
lakini mfano wa kitu kinachoonekana unawasaidia watu kuuelewa na kuukumbuka
ujumbe.)
1.
Tunazo rejea kadhaa kwenye mafungu haya zinazourejea
mji wa Tofethi. Soma Isaya 30:33 na 2 Wafalme 23:10 kisha uniambie maeneo haya
yanaonekana kuwa ni mahali gani? (Hii ni jehanamu ya duniani. Walitengeneza
moto mkubwa kisha wakawachoma watoto wao kama sadaka kwa Baali na Moleki.)
1.
Je, masikio yako yanawasha? Yeremia anasema kuwa
Yerusalemu itakuwa kama jehanamu hapa duniani. Je, mwitikio wako ungekuwaje
endapo Yeremia angekuwa anazungumza nawe kwa namna hii?
I.
Mwitikio wa Viongozi
A.
Soma Yeremia 20:1-2. Masikio ya viongozi wa dini
yanawaka moto sana kiasi kwamba wanampiga Yeremia na kumtia katika mkatale. Nilipokuwa
Williamsburg, Virginia, nilijaribu kuvaa mikatale ya mbao waliyonayo katika
kijiji cha kikoloni. Endapo una uzoefu wa jinsi mtu anavyojisikia akiwa amevaa
mkatale, hebu niambie ni matatizo gani ya ziada unayoweza kuyafikiria kwa mtu
kupigwa kwanza kabla ya kuvaa mikatale? (Soma Kumbukumbu la Torati 25:2-3.
Mikatale inatia karaha sana, na endapo muda mfupi tu nitakuwa nimetoka kuchapwa
viboko, mambo yatakuwa mabaya zaidi!)
1.
Unakielezea kitendo ambacho viongozi wa dini walimtendea
Yeremia? (Machafuko ndio majibu ya watu ambao hawawezi kujenga hoja ya kujibu
mada iliyoibuliwa.)
A.
Soma Yeremia 20:3-6. Je, Yeremia amepata fundisho
lolote? (Anamwambia Pashuri, mtu ambaye alimwingiza kwenye mkatale, kwamba
atatiwa hofu (jina lake jipya linamaanisha “hofu kila mahali”), atakamatwa na
kufia Babeli.)
1.
Tunapata ishara (kidokezo) gani kuhusu matamanio
mahsusi ya Pashuri katika kile anachokitabiri Yeremia? (Msitari wa mwisho
unatuambia kwamba Pashuru ni nabii wa uongo ambaye amekuwa akisema uongo kuhusu
hatma ya Yuda. Sasa tunaona kwa wazi zaidi sababu ya Pashuri kutaka kumdhuru
Yeremia.)
I.
Mwitikio wa Yeremia
A.
Soma Yeremia 20:7-8. Unajisikiaje watu wanapokufanya
kuwa kituko kwao? Wanapokufedhehesha? Fikiria kwamba watu hawakukuheshimu,
badala yake kila siku wanakufanyia mzaha. Je, utakuwa na mtazamo gani wa
maisha, hususani pale ambapo dhihaka inaendelea kuwa ile ile?
1.
Soma Yeremia 1:6-8. Unayakumbuka mazungumzo haya kati
ya Mungu na Yeremia mwanzoni kabisa? Yeremia anamaanisha nini anaposema kwamba
Mungu “amemhadaa?” (Mungu alimwambia Yeremia asiogope, na kwamba Mungu atamwokoa.)
a.
Je, Mungu amemhadaa Yeremia?
a.
Endapo umesema kuwa, “ndiyo,” (au “huenda”), je, hii
inaashiria nini kuhusu uhakika wa Yeremia katika ujumbe wake mkuu anaoupeleka
Yuda?
A.
Soma Yeremia 20:9. Kwa dhahiri Yeremia alijaribu
kufumba mdomo wake ili kuepuka dhihaka zaidi. Kwa nini hilo ni tatizo?
(Kuyatenda mapenzi ya Mungu ni sawa na moto ndani yake. Hawezi kuuhimili moto
wa Mungu ndani yake.)
1.
Je, umewahi kupitia uzoefu huo? Kuyatenda mapenzi ya
Mungu inaonekana ni jambo la kawaida sana kiasi kwamba huwezi kuacha kuyatenda?
A.
Soma Yeremia 20:10. Je, ni maadui wa Yeremia pekee ndio
wanaomdhihaki na kumpinga? (Yeremia anaandika kuwa “rafiki zangu wote” wanamvizia
atende kosa.)
1.
Utagundua kwamba marafiki wana matumaini kuwa Yeremia
“atahadaika.” Je, hivi punde tu Yeremia hajasema (Yeremia 20:7) kwamba
alihadaiwa?
a.
Je, hii inamaanisha Yeremia anaamini kuwa “marafiki”
zake (ambao kiuhalisia ni maadui wake) watashinda?
A.
Soma Yeremia 20:11. Unaelezeaje kauli hii ya kijasiri
kwa kuzingatia Yeremia 20:7? (Yeremia ni mwanadamu. Alipigwa. Amedhihakiwa na
kuaibishwa. Imani yake ilitetereka mambo mabaya yalipotokea ambayo alidhani
Mungu angeyazuia. Lakini sasa imani yake inaimarika.)
1.
Aibu anayoipata Yeremia inatofautianaje na aibu
watakayoipata maadui zake? (Aibu yake ni ya muda [si ya kudumu]. Aibu yao
“haitasahauliwa kamwe.”)
a.
Tunajifunza nini katika jambo hili? (Mara zote
tunapaswa kuwa na “mtazamo mpana” maishani. Mambo yanaweza yasituendee vizuri
kwa kipindi fulani, lakini hatimaye Mungu ameahidi kutenda mambo yote kwa usahihi.)
A.
Soma Yeremia 20:12. Je, tutajisikia vizuri kufahamu
kwamba hatma ya wale waliotutesa haitakuwa nzuri? (Soma Luka 23:34 na Marko
11:25. Yeremia anaweza kujisikia vizuri kuomba kuona kisasi, lakini huu sio
mtazamo ambao Mungu anatutaka tuwe nao.)
A.
Soma Yeremia 20:14-15 na Yeremia 20:18. Je, Yeremia
anarejea kwenye msongo baada ya kauli yake kuu ya imani katika Yeremia 20:11? (Ndiyo,
sasa anasema kuwa anatamani kamwe asingezaliwa.)
1.
Soma Yeremia 1:4-5. Mungu anasema kuwa alimjua Yeremia
“akiwa tumboni” na yeremia anasema kuwa anatamani angefia tumboni, kuliko
kuishi maisha ya nabii. Tunajifunza nini? (Yeremia anaonekana kama vile yupo
kwenye msongo mkubwa wa mawazo. Watumishi wa Mungu wanaweza kupitia nyakati
ambazo wanakuwa na msongo wa mawazo. Ukitafakari jambo hili, unaweza kukumbuka
kwamba Sulemani alikuwa na msongo wa mawazo (Mhubiri 6 & 9), Eliya alipata
hofu na alikuwa na msongo wa mawazo (1 Wafalme 19), na Daudi aliogopa (1
Samweli 21:12-13). Mungu anatufunulia mambo haya ili tusidhani kuwa sisi pekee
ndio tunaopitia uzoefu wa aina hii.)
A.
Soma Yeremia 21:1-2. Hebu subiri kidogo! Ni nani sasa
ambaye anaomba ushauri? (Mfalme Sedekia! Sasa Yeremia anaombwa na afisa wa
ngazi za juu wa nchi yake amuulize Mungu.)
1.
Unapohisi kukata tamaa na kuogopa, unajisikiaje pale
mtu wa muhimu kabisa anapoomba msaada wako?
I.
Uchaguzi wetu
A.
Soma Yeremia 18:1-5. Mungu anamwambiaje Yeremia kuhusu
kupeleka ujumbe mwingine kwa mfinyanzi? (Kwa mara nyingine, huu ni msaada wa
kitu kinachoonekana ili kusaidia kuelewa ujumbe wa Mungu.)
A.
Soma Yeremia 18:6-10. Tunajifunza nini kuhusu uelewa
wetu wa unabii? (Tunao wajibu wa kutimiza katika siku zetu zijazo. Kwa kuwa Mungu
anazifahamu siku zijazo, nina uhakika kwamba baadhi ya unabii unaakisi maarifa
ya Mungu juu ya wakati ujao na hauna vigezo. Kwa upande mwingine, Mungu
anamwambia Yeremia kuwa wanadamu wanaweza kubadili kile anachokisema Mungu
kutokana na tabia zao. Angalao baadhi ya unabii una vigezo.)
A.
Rafiki, je, mara nyingine huwa unajisikia kukata tamaa?
Endapo mambo hayakuendei vizuri kutokana na chaguzi zako mbaya, Mungu
anatuambia kwamba mustakabali wetu unaweza kuboresheka ikiwa tutayafuata
mapenzi yake. Endapo mambo yanakuendea kombo kwa sababu umekuwa ukiyafuata
mapenzi ya Mungu, na watu waovu wanakudhuru, Mungu anasema kuwa
atalishughulikia tatizo na kulitekeleza kikamilifu katika siku za usoni. Jambo
la msingi ni kuyafuata mapenzi ya Mungu. Je, utafanya uamuzi, sasa hivi,
kufanya hivyo?
I. Juma lijalo: Matendo ya Ishara.
No comments:
Post a Comment