Mahubiri makubwa yatikisa jiji la Mwanza [@Babatisda]

Posted on Sep 01 2014

Mahubiri makubwa yaliyokuwa yanasubiriwa kwa hamu na watu wa Jiji la Mwanza yamefunguliwa rasmi Augost 31, 2014.

Mchungaji wa mtaa wa Nyakato na Mwenyekiti wa kamati kuu inayoratibu mahubiri makubwa Jijini Mwanza Ibrahimu Alex Juma amesema, zaidi ya Wahudumu 300 kutoka sehemu zote za Union ya Kaskazini mwa Tanzania wamekwisha wasili na kukabidhiwa kwa wenyeji wao.

Takribani vituo 180 Vitafanya huduma ya uponyaji wa kimwili, kiakili na kiroho. Na mahubiri hayo yatafanyika kwa muda wa wiki tatu.

Mhazini wa Union ya kaskazini mwa Tanzania Ndugu Dickson Matiko amesema kwa siku 21 tufundishe neno la Mungu, misingi ya Imani yetu, tutumie Biblia katika mahubiri yetu. Pia Mhazini huyo amesema kama isemavyo katika Mathayo 24:14 kwamba, Tena habari njema ya ufalme itahubiriwa ulimwenguni mwote kuwa ushuhuda kwa mataifa yote na hapo ndipo ule mwisho utakapokuja. Hivyo Hata na sisi tunatakiwa kuwa nuru kwa wengine ili tuweze  kuwaangazia Habari njema.

Awali kabla ya kumkaribisha ndugu Matiko Katibu wa kamati ya mahubiri makubwa Jijini Mwanza Philip Joseph kwa kushirikiana na wataalam wa kurusha mahubiri kwa njia ya mtandao. amesema, “Lengo la kuweka mahubiri hayo kwa njia ya mtandao ni kumsaidia hata na Yule aliye mbali na Jiji la Mwanza kupata injili mtandaoni”.

Pia ameendelea kusema “Mahubiri yamewekwa mtandaoni ili kuweza kumfikia mtu yeyote aliye ndani na nje ya nchi ya Tanzania, kwa wale watakaoamini na kumpokea Yesu Kristo kama Bwana na mwokozi wa maisha yao wataelekezwa kanisa la waadventista Wa sabato lililo karibu nao”.

Aidha Joseph amesema mahubiri hayo yamewekwa katika ukurasa wa Facebook na Twitter. Mwisho aliwaomba watu wa Jiji la mwanza kutumia Teknolojia habari na Mawasiliano kwa kujielimisha na kumtukuza Mungu.

Mahubiri hayo pia yanapatikana kwa njia ya mtandao wa kijamii ujulikanao kama facebook au kwa kufungua anuani ya mahubiri hayo ambayo ni www.Mwanzaevangelism.org

Aidha matiko amesema kwa wale wasio kuwa na elimu ya kufungua mtandao watatumia njia nyingine kama vile kusikiliza Redio, Wasafiri wa daladala na wao watapata kusikia masomo Hayo . Pia mwenyekiti wa Union ya kaskazini Dr. Godwin Lekundayo na katibu wa Union Pr. Davis Fue wataungana nasi katika kazi hii kubwa ya jiji la Mwanza

Na: Aston J. Mmamba

Mkurugenzi wa Mawasiliano SNC